(تقرير التربة والجسات)
#خليك_مهندس_محترف
(تقرير التربة والجسات)
😉وهو ده هيكون موضوعنا انهارده .. البوست حاول انك تحفظه عندك عشان ميضيعش منك وزي ما اتعودنا مع بعض هنتكلم بطريقة مبسطة و سهلة عشان كلنا نقدر نستوعب الموضوع وناخد عنه فكرة كويسة جدا ان شاء الله 
👍أول حاجة يعني أيه جسات أساساً 
🤔الجسات دي عبارة عن حفر قطرها من 2 إلي 2.5 بوصة بعملها في التربة بتاعتي عن طريق ماكينة الجسات بحيث أني أقدر أخد عينة من كل متر طولي من التربة عشان أحللها وأدرسها ويطلعلي تقرير التربة .طب تقرير التربة ده بيفيدني بأيه .. أيه الحاجات اللي بيقدمهالي 
🙂1- تحديد منسوب التربة الصالحة للتأسيس2- تحديد منسوب المياه الجوفية بالتربة وطريقة نزحها3- تحديد جهد وقوة تحمل التربة4- تحديد نوع الاساسات ( قواعد - لبشة - خوازيق )5- تحديد حمل التشغيل للخازوق وتسليحه لو التربة محتاجة خوازيق6- تحديد طريقة سند جوانب الحفر ( تقرير سند جوانب الحفر )7- تحديد منسوب وسمك وعدد طبقات الأحلال8- نوع الأسمنت المستخدم في الاساسات .( تخيل معايا بقي ان المقاولين مبيعملوش الجسات وبيعتمدوا علي خبرتهم ومتصورين أنها حاجة ملهاش أهمية ومبيبقاش عندهم أي فكرة عن النتائج اللي بيقدمهالك تقرير التربة دي .. عرفت بقي ليه العمارات بتميل وتقع 
😎طب أنا بعمل كام جسة في الموقع بتاعي ( يعني كام حفرة ) 🤔ده بيعتمد علي مساحة المبني بتاعكلو أقل من 100 متر2 ( غرفة حارس - غرفة مولدات كهربية ) .. جسة واحدة وتسترشد بالمباني المجاورة .لو ( 100- 300 ) .. جستينلو أكبر من 300 متر2 .. كل 300 م2 بتاخد جسة( في المواقع الكبيرة بيعمل شبكة X , Y وبياخد جسة كل 15 م .. ده موقع كبير بمئات الملايين يعني مفيش تهاون ولا سماح بأي نسبة غلط )طب انا عرفت دلوقتي باخد كام جسة علي حسب مساحة الأرض طب وأماكنهم بقي 
🙃تحاول انك تاخد من اماكن تديك دلالة عن الأرض بتاعتك كلها وهتلاقي صورة مرفقة عاملهاك بعدد الجسات وأماكنها وده المتداول في الجسات .تمام جداً أنا عرفت باخد كام جسة وأماكنهم فين طب عمق الجسة قد أيه بقي .. يعني بفضل أحفر لغاية عمق كام 🤔أنا بعمل الجسات والهدف الأساسي منها أني أعرف منسوب التربة الصالحة للتأسيس وأحنا اتفقنا أني بحفر متر طولي وأخد عينة وأحفر متر بعده وأخد عينة وهكذا لغاية العمق المطلوب .. يبقي أنا لازم أعدي كل الطبقات السطحية الغير صالحة للتأسيس ( طبقات الردم والمواد العضوية والتربة الطينية الضعيفة جدا ) لغاية ما أوصل لتربة صالحة للتأسيس وعادة بتكون ( تربة رملية - حجر جيري - تربة صخرية ) .. طب انا أعرف منين أني لو وصلت لتربة منهم متكونش مجرد طبقة وتحتها تربة ضعيفة لا تصلح .. علشان كده لما بوصل لواحدة من التربة الصالحة للتأسيس بفضل أنزل بعمق معين لتمام التأكد من أستمرارية التربة الصالحة للتأسيس .لولقيت تربة رملية * بنزل بعمق 10 متر وأفضل أخد عينات .لو لقيت حجر جيري * بنزل بعمق 6 مترلو لقيت صخر * بنزل بعمق 3 م( الخلاصة ) بحفر لغاية ما أعدي كل الطبقات السطحية لغاية ما اوصل لتربة صالحة وبنزل منها غلي حسب نوعها الأعماق المذكورة سابقاًوبأي حال من الأحوال لا يقل عمق الجسة عن 10 متر إلا في حالة لو وجدت تربة صخرية علي عمق قريب فبنزل منها 3 متر عشان اتأكد من أستمراريتها وأنها مفيهاش فجوات ولا تشققات .
✊طب العينات اللي باخدها من كل متر طولي بحفظها ازاي وببعتها للمعمل ازاي 🤔العينات المستخرجة لازم أحافظ عليها كويس وأحفظها بالشمع في كيس أو في ورق مفضض ( فويل ) وأشيلها في علبة وأكتب علي كل عينة أسم الموقع ورقم الجسة وعمق العينة ومكان العينة وتاريخ استخراجها ولازم أبعدها عن أشعة الشمس عشان لو فيها ماء ميتبخرش ولازم ابعدها عن الاهتزازات عشان لو كانت متماسكة ميضعش التماسك ده .. لأن كل تفصيلة في العينة ليها دلالتها عند المعمل وممكن يبقي عندي تربة طينية متماسكة وقوية إلي حد ما واقدر اعتبرها تربة التأسيس .. فالحفاظ علي العينات مهم جداطب مفيش حاجة أعملها وأنا واقف في الموقع أعرف من خلالها نوع التربة 😉هات كوب ماء وحط فيه كمية من التربة اللي عايز تعرفها وقلب بالمعلقة شوية وبعد ما تخلص تقليب هتلاقي1- التربة الطميية silt بتترسب ف حوالي 15 ثانية2- التربة الرملية sand بتترسب في حوالي 30 ثانية3- التربة الطينية clay بتفضل علي السطحلغاية دلوقتي كويس جدا بس انا عايز أعرف العمق ده بنزله منين يعني بحسب الامتار دي منين .. ده انا الموقع عندي مش منسوب واحد 🤔فني المعمل لما بيجي الموقع بياخد منسوب الأرض الطبيعية بتاع أول جسة هياخدها وبيعتبر ده ( صفر الجسة ) وبينسب عليه باقي الجسات وبيربطه بالصفر المعمارييعني( الصفر المعماري ) ده منسوب الرصيف أو منسوب الطريق + 20 سم( صفر الجسة ) ده منسوب الأرض الطبيعية لأول جسة .ركز بقي .. في تقرير التربة لما هيديك طول الخازوق هيدهولك من صفر الجسة فلو قالك ان طول الخازوق 18 متر وأنت لما حسبت عرفت ان الصفر المعماري اعلي من صفر الجسة ب 0.5 م يبقي انت لما هتنفذ الخازوق هتنزل 18.5 متر من الصفر المعماري .. الكلام ده مهم جدا لأنك ممكن تحفر وممكن منسوب الأرض الطبيعية اللي أخد منه صفر الجسة يضيع او يختلف .. يبقي لازم وانت واقف بميزان القامة تربط صفر الجسة علي طول بالصفر المعماري بتاعك .أهم حاجة بقي أزاي ماتعرضش للغش ولا يتنصب عليا 😉أول حاجة لازم تعرف أنك بتستلم عمق الحفر بعدد المواسير اللي نزل من الماكينة في الحفرة يبقي كده1- لازم تكون واقف في مكان تكشف بيه كل الموقع عشان العمال متنزلش 2 خط مواسير في الحفرة الواحدة .2- العينة المستخرجة لازم تكون عينة أسطوانية3- تكون مركز جدا لأن في مكاتب أستشارية بتيجي تشتغل أي حاجة وبيديك تقرير من عنده بيعتمد فيه علي الخبرة من مواقع في نفس المنطقة4- متستلمش ولا تحسب غير طول الماسورة اللي نزل فعلياً في حفرة الجسة .5- المواسير بتركب في بعضها فمتحسبش سن المواسير اللي بيتركب في الماسورة اللي بعدها.6- أتأكد من جودة شريط القياس اللي بتقيس بيه ويستحسن يكون عندك شريط خاص بيككده أحنا بقي عندنا فكرة مبدئية ممتازة عن الجسات تقدر أنت تتوسع في الموضوع زي ما تحب والصور المرفقة دي من الأنترنت جمعتها من مصادر مختلفة عشان تتخيل الموضوع بشكل أفضل .
0 التعليقات:
إرسال تعليق